في رثاء الشاعر الفقيد ستار صياحي
لم لم أغـيومه ألسمه
ترجم ألعـبَـره ومُطـر
مطرت و فاضت مشاعر
مـاتت أبچفة الـنهـر
غمضت عين البلابل
ماتت أبحضن الشجـر
منكسرگلب القوافي
تمطر أعيون الشعر
سافرت كل المعاني
و الغزل ضاع ابسطر
يا الم بحر الطويل
يا مدح،حكمه وعـبـَر
يا صدر عجز القاصيد
يا سجع ،هـوسه و نثر
احترگ دفتر شعرنه
و الشعر بعده انتحر
انطوى ليل الأحبه
ومات عطشان الگمر
حارس انجوم الليالي
ذاب بعيون السهر
تاب خمار الخرايب
ماشرب بعده و سكر
يا شكر ومضة شعرنه
بعد ما يحله السمر
ينحب اعگالك ذبحني
صبريته و مـاصبر
حتى طيرك طيريته
طاح و جناحه انكسر
ثاري عاشگ مثلك انته
ايريد وياك ابگـبـر
لاتلوم الناي محزن
ماعزف ليل و فجر
كلهه تبچيلك محنه
كل صريفه وكل قصر
من رحت ماودعتني
اشلون رحت بلا خبر؟
فاضل الاحوازي نموت ويحيى الوطن
