شفتوا ام الشهيد اشلون شالت سيف
اتريد الثار و تحشم بهاليها
و تنخه بالعرب و اتگول ماكو ناس
يا حيف العرب چن نست ماضيها
خل اتذب عگلها و تلبس طرابيش
مو راحت النخوة و كل مباديها
هاي ام الشهيد اتصيح بأعلى الصوت
ذبو للعگل نزعوا چفافيها
ايذبحون بولدكم هل صبر چندوب
چندوب الصبر لاوين تاليها
هاكم شيلتي و لبسوا العصابة
و هاي الگاع خل نسوان تحميها
هاي احوازكم يومية تنخاكم
ياهو الگالها عونج و يفديها
و عطونه الچفافي و هاكم الشيلة
و احنه على الفرس ظلمه نسويها
وين الغيره راحت وين نخوتكم
و ليش الگاع مغصوبة نخليها
و هاي الگاع مغصوبة و تنخاكم
و عزة الگاع تدري بزود راعيها
شدوا حيلكم يا عرب شدوا الاحزام
و خل نگلب اسفلها احنه على عاليها
و لازم كون نرفع راية العزة
و على ربوع الأحواز احنه نعليها
ارجوا المعذرة منكم يهل الثوار
هاي ام الشهيد و حيل ما بيها
و من حگها ترى هي تعتب اعليكم
و من حگها تشيل السيف بيديها
و تشوف الگاع محتلة و مغصوبة
و المحتل يصبحها و يمسيها
و انتم يا عرب نومه فلا تصحون
اعبيد الجابها و زيد اليوديها
ما ننسى اختنا الماجدة الحرة
الزفتهم ثلاثة و حنت ايديها
هي الخنساء تراهي و فاقدة الاولاد
و من واجب علينا احنه نواسيها
فقدتهم ثلاثة و هم تريد الثار
و الرابع اسير الما غلى اعليها
و سألناهه و سمعنه كل حچيها ابزود
تگول ارض الاحواز اشلون نعطيها
اذا ماكو ارجال اتضحي للأحواز
يجينه الدور للنسوان نفديها
سألنه الوالد و كال احنه منذورين
كل احنه جنود للأحواز نحميها
مطلبنه الشهادة و يعنينه الموت
نموت احنه و ارضنه ابدم نحنيها
الموته ابعز ترى هي ترفع من الشأن
بس اعلى الوطن كل احنه نحييها
نتعنه المنايا و نترك احنه الخوف
و هاي الگاع بلدم كون نسقيها
نموت احنه و تضل أحوازنا حرة
و لو يغلى الثمن برواح نشريها
شاعر ابن الكرخة (تألفت هذه القصيدة يوم استشهاد الأخوة الحيادر)
