آنه و صديقي سافرت ، رحنه الشمال اوطانهم
شفنا هابس خير و فرح ، و احنه الگحط باوطانه
عدهم فواکه کل شکل ، کلشي و كلا شي اشجارهم
و احنه حبابوك و نبگ ، و الخروع احلی اشجارنه
عدهم عمایر عالیه و اشحلوه ذیچ ادیارهم
و احنه الصرایف من گصب ، تلعب الروح ادیارنه
الماي اصفی من الذهب ، و عیون تجری بمایهم
کارون صایر مزبله و ریحة مجاري بماينه
اطفالهم بالمنتزه ، و اشحلو لعب اطفالهم
و احنه اللي مامش منتزه بالعجد لعب اطفالنه
يحچون کلهم گیلکي و ماکو خلط بلسانهم
و احنه حویج و خربزه و مشبوش بحچایاتنه
اصخولهم ترتع ورد، فوگ الیبال اصخولهم
و غنیمنه تاکل تبن ، عاگول اچل ایمالنه
حتی چلبهم منتشع ، یعجبنی طبع اچلابهم
و احنه چلبنه من التعب ، نایم ابعتبة بابنه
نسوانهم بيض و حمر و مدللات ابيالهم
مليانه من ضيم و قهر مگروده یا نسوانه
عدهم رواتب عالیه ، و متوظفین اولادهم
و احنه البطاله و الکسل و ادمان سهم اولادنه
تمطر هناک ابرهدنه ، و تختلف حتی غیومهم
واحنه سمانه بیه حصو ، مایعول ایبخ گاعنه
عدهم مزارع و اسعه و عایش بعز فلاحم
تبچی علی حاله و کل وکت ماکول حگ فلاحنه
عدهم من انواع السمچ و شگد لذیذه اسماکهم
گطانه فر و ملخ من نشفوا نهرانه
ایخبزون بانواع الخبز بربری و سنگک عیشهم
واحنه فطیر و محترج ما تنعسل خبزاتنه
ماشفنه دحره و لاعرک متفاهمین ارجالهم
واحنه المشاگف و الچتل و العطوه عند ارجالنه
بس چایهم چاي الوطن
ما تشفي طبخة چایهم
مهیل و یشفی الگلب
کل وکته خادر چاینه
(ابوسعید موسی الجرفی)
