قصيدة ثورة القوافي من كلمات الشاعر الشاب طارق ابو فراس الاحوازي و انتاج عماد عماد

فزعت اليوم القوافي امحزّمات
وقفن ابّباب القريحة او هلهلن
او قامت ادموع القريحه اتصب شرار
او نزلن إبموقد اشعاري اتصطّرن
والمشاعر ثارت إعليهه الحروف
چن بحر وأمواجه من يتلاطمن
صاحن إعله القلم ما بسّك سكوت ؟
شرايين الغيرة بيك اتقطّعن ؟
ولك لابد هزّتك دمعة يتيم
إعيونه من كت الدمع بسما عِمن

ولك چا لو تستحي چان استحيت
ابيوم سمعيت الحرائر حشّمن
ابيوم مربيهن هظم هدّ الجبال
شعرتين ابشاربك متحرّكن ؟!
ولك چا لو تستحي چان استحيت
يوم رفعنهه السيوف او هوسن
الحرائر ، ماجدات ، الثائرات
الربّن إرجال او هدنهم للوطن
وانته وينك يا قلم من هالحديث
بيك چا بلچه المشاعر يستحن ؟

واشوكت من نومته يصحه الضمير
عدنه كثرة اهموم نحچيهه لمن؟
المشانق اجت تطرق باب باب
بيت بيت ابكل شوارعنه مشن
يتعنن قدر للما يدنّگ راس
وين ما تنبض الغيرة چيّمن
رادن انعوف العقيدة او نطخ راس
مادرن بينه احنه ياهم مادرن
احنه خزعل واحنه محيي
ارجال نيبه او للابد صولاتهم ماينسن
واحنه عاصي او حيدر او حته او شلش
ارقابهم ما يوم للذل دنّگن
واحنه ابناء الأمير إمهنّه ذاك
خصمه لسه اجروحه لينه او ماشفن
يا قلم حرك ضميرك واصحه عاد
او فتح اعيون العله الذله غفن
او صيحة الـ الله واكبر خل تثور
اقصور كسرى اليوم خل يتزلزلن
خلهم إيعرفون إحنه احوازيين
الغير الله إرگابنه ما هبطن

(طارق أبو فراس الأحوازي)

لمشاهدة القصيدة بصوت الشاعر طارق ابو فراس الاحوازي و انتاج الاخ عماد عماد نرجوا الضغط على الرابط التالي

http://www.youtube.com/watch?v=HUZ_JegLZ04&feature=youtu.be